Semeytany.kz – Облыс әкімі Берік Уәли Бесқарағай ауданына жұмыс сапары барысында Қарағайлы ауылында жаңадан салынған дәрігерлік амбулаторияны аралап көріп, нысанды қысқа мерзімде іске қосуды тапсырды.
Медициналық мекеме «Ауылда денсаулық сақтауды жаңғырту» ұлттық жобасы аясында салынған. Қазіргі таңда ғимарат толықтай қажетті медициналық жабдықтармен және жиһазбен қамтамасыз етілген, сондай-ақ электр және су жүйелері тартылған.
Жаңа амбулатория іске қосылғаннан кейін Қарағайлы мен Башкөл ауылдарының шамамен 2 мың тұрғынына алғашқы медициналық көмек көрсетілмек. Қазір ауылда үш медицина маманы бар.
Аймақ басшысы амбулаторияны аралау барысында аудан әкімі мен Денсаулық сақтау басқармасына жас мамандар тарту жұмысын жеделдетуді тапсырды. Сонымен қатар ауыл ақсақалдарымен кездесіп, олардың ұсыныс-пікірлерін тыңдады.
– Тоғыз жолдың торабында орналасқан Бесқарағайға бұл – төртінші сапарым. Алғашқы сапарымда негізгі мәселелерді түртіп алғанмын. Енді оларды жүйелі шешуге кірістік. Бүгін Канонерка ауылындағы Мәдениет үйі мен Бесқарағай ауылындағы колледжге бардым. Екеуіне де ағымдағы жөндеу жүргізілетін болады. Облыс бойынша 64 медициналық нысан салынды, оның 10-ы – дәрігерлік амбулатория. Соның бірі – Қарағайлыдағы жаңа нысан. Бұл бағыттағы жұмыстар жалғасады, – деді облыс әкімі.
