Semeytany.kz – Абай облысының әкімі Берік Уәли бүгін «International Cement Group LTD» компаниясы директорлар кеңесі төрағасының орынбасары Вей Пингпен кездесті. Басқосу барысында «Sharcem» цемент зауытын жаңғырту жобасының нәтижелері мен болашақ даму жоспарлары сөз болды.
Компания өкілдері зауытты жаңарту жұмыстарының сәтті аяқталғанын айтып, ендігі мақсат – өндірістік қуатты арттыру екенін жеткізді. Сондай-ақ, кәсіпорын өңірде әлеуметтік және инфрақұрылымдық жобаларға атсалысуға дайын екенін білдірді.
Кездесуде сингапурлық инвесторлар «Semey Smart City» атты жаңа қалалық ауданның құрылысына қатысуға қызығушылық танытты. Бұл жоба Семей қаласының тұрақты дамуына серпін беретін бастама ретінде бағаланып отыр.
– Абай облысы шетелдік инвесторлар үшін әрдайым ашық. Өңірдің әлеуметтік-экономикалық әлеуетін арттыруда халықаралық серіктестіктің орны ерекше, – деді облыс әкімі Берік Уәли.
Кездесу нәтижесінде тараптар ынтымақтастықты одан әрі тереңдетуге ниетті екенін білдірді.
