Semeytany.kz – Абай облысында «AMANAT» партиясы мен Halyk Bank-тің бірлесуімен жүзеге асырылып жатқан «Қарызсыз қоғам» жобасы аясында 20 мыңнан астам адам қаржылық сауаттылық бойынша білім алды. Бұл туралы Өңірлік коммуникациялар қызметінде өткен баспасөз мәслихатында «AMANAT» партиясының облыстық филиал төрағасы Айдар Садырбаев мәлімдеді.
– «Қарызсыз қоғам» – халықтың қаржылық сауаттылығын арттыруды мақсат еткен партиялық бастама. Абай облысында 34 оқу легі өткізіліп, 7 352 адам қамтылды. 2024 жылдан бастап жоба «Қарызсыз қоғам 2.0» форматында жалғасуда. Ол 90 күннен астам мерзімі өткен берешегі бар азаматтарға бағытталған. Ақпан айынан бері 2 066 адам кәсіби кеңес алды, – деді Айдар Садырбаев.
Жоба аясында тек оқыту емес, практикалық көмек көрсету де қарастырылған. Бұл жайлы Абай облысының Қаржы басқармасының басшысы Гүлфайрус Серікболова түсіндіріп өтті.
– 2025 жылғы 1 маусымнан бастап жоба толықтай онлайн форматқа көшті. Енді мақсатты топқа жататын кез келген азамат qogamfin.kz сайтына кіріп, тіркелу арқылы жобаға қатыса алады. Әрбір қатысушыға қаржы сарапшылары мен заңгерлер жеке кеңес береді. Барлық қызмет тегін әрі қолжетімді түрде ұсынылады, – деді спикер.
Жоба халық арасында қарызды басқару, несие алу мәдениеті мен қаржылық жоспарлау туралы түсінікті кеңейтуге бағытталған. Жергілікті тұрғындар үшін бұл – қаржылық қиындықтарды еңсерудің жаңа мүмкіндігі.
