Semeytany.kz – 2025 жылғы 13–20 маусым аралығында Алматы қаласында өтетін IQanat республикалық олимпиадасының финалына Абай облысынан 39 оқушы қатысады. Бұл – облыстың 10 ауданынан келген дарынды жастардың үлкен жетістігі.
Финалға жолдама алған оқушылар облыстық кезеңде 300-ден астам үміткердің арасынан іріктеліп, үздік деп танылды. Олар – ауыл мектептерінің 8-сынып оқушылары.
IQanat – еліміздегі ауыл мектептеріне арналған ең ауқымды білім беру жобаларының бірі. Биылғы байқауға Қазақстанның барлық өңірінен 50 мыңнан астам оқушы қатысып, оның 1000-ы финалға өтті.
Олимпиаданың басты жүлдесі – IQanat High School of Burabay мектебінде тегін оқу гранттары. Финалистердің бір бөлігі аталған мектепте оқуға мүмкіндік алса, қалғандары үш жылдық тегін дайындық бағдарламасына қатысады. Бұл бағдарламада ҰБТ мен халықаралық емтихандарға дайындық, ағылшын тілі, ІТ және кәсіпкерлік негіздері бойынша тереңдетілген сабақтар өтеді.
Финал апталығында қатысушылар:
-
Пәндік тест тапсырады
-
Soft skills дамыту бойынша тренингтерге қатысады
-
Алматы қаласы мен ЖОО-ларға экскурсия жасайды
-
Peer-to-peer тәлімгерлерімен кездеседі
Бұл олимпиада – ауыл балалары үшін үлкен мүмкіндік және өмірлік жолды таңдауға бағыт беретін шешуші кезең.
