Semeytany.kz – Абай облысы Мақаншы ауданында орналасқан «Дарабоз» жазғы сауықтыру лагері биылғы маусымдағы алғашқы балалар легін қабылдады. Лагерь жұмысы 6 маусыммен, әр кезеңі 10 күннен өтеді. Жаз бойы 720 бала тынығады.
Лагерь 10–14 жас аралығындағы 5–8 сынып оқушыларына арналған. Балалар демалысы жергілікті бюджет пен «Қазақстан халқына» қорының есебінен ұйымдастырылып отыр.
Қауіпсіз әрі мазмұнды демалыс ұйымдастыру мақсатында лагерьде 10 педагог жұмыс істейді. Олардың қатарында аға тәлімгер, тәрбиешілер, дене шынықтыру пәні мұғалімі, жүзуден нұсқаушы және медбике бар. Мамандар балалардың күн тәртібін, ойын-сауық бағдарламаларын кәсіби деңгейде жүргізіп, қауіпсіздікті қамтамасыз етеді.
Күнделікті бағдарламаға мыналар кіреді:
-
Таңғы жаттығу
-
Суға жүзу
-
Спорттық жарыстар
-
Шығармашылық үйірмелер (би, қолөнер, ақындар клубы)
-
Экскурсиялар
-
Зияткерлік ойындар
-
Би кештері мен тақырыптық күндер
Лагерь аумағы барлық санитарлық және өрт қауіпсіздігі талаптарына сай келеді. Мұнда бейнебақылау, медициналық пункт, таза ауыз су мен дезинфекциялық құралдар қарастырылған.
«Дарабоз» лагері – балалардың денсаулығын нығайтып, жаңа достар тауып, танымын кеңейтетін, жарқын естеліктерге толы жазғы демалыс орнына айналып отыр.
