Semeytany.kz – Облыс әкімі Берік Уәли Семей қаласына жұмыс сапары барысында жол жөндеу жұмыстарының барысымен танысты. Сапар аясында аймақ басшысы сол жағалаудағы Крестьянская көшесіндегі жол құрылысын бақылап, мердігерлерге нақты тапсырмалар берді.
Биыл қалада ұзындығы 40 шақырымнан асатын 52 көшеде жөндеу жұмыстары жүргізіледі. Оның ішінде 36 көше бұған дейін ешқашан асфальтталмаған, тек қиыршық тас төселген. Бұл көшелерге бірінші кезекте назар аударылып отыр.
Барлық нысандар 6 жобаға бөлініп, мемлекеттік сараптамадан өткен. Қазіргі таңда 3 жоба бойынша мердігер ұйымдар анықталып, Крестьянская және Өтепбаев көшелерінде жөндеу жұмыстары басталды.
– Биыл Семейде 50-ден астам көше жаңа кейіпке енеді. Бұл – өте ауқымды жұмыс. Бұрын асфальт көрмеген көшелерге басымдық беріп отырмыз. Бұл бағыттағы жұмыстар жалғасын табады, – деді облыс әкімі Берік Уәли.
Сонымен қатар аймақ басшысы Семей аспалы көпіріндегі жөндеу жұмыстарының барысымен де танысты. Қаланың қос жағалауын байланыстыратын бұл маңызды өткелде асфальт жабындысы толық ауыстырылуда.
Қазіргі уақытта ескі жабындыны қыру жұмыстары аяқталып, арнайы материал төсеу басталған. Бұл жұмыстар көпірге арналған арнайы технологиямен, тәжірибелі мамандардың қатысуымен атқарылуда.
Асфальтты ауыстыруға 80-ге жуық жұмысшы мен 20-дан астам арнайы техника жұмылдырылған. Жөндеу жұмыстары шілде айында толық аяқталады деп жоспарланып отыр.
