Semeytany.kz – Қарағанды облысына жұмыс сапары аясында Премьер-министр Олжас Бектеновтің төрағалығымен «Моноқалалардың болашағы: оң тәжірибе және тұрақты даму» атты республикалық семинар-кеңес өтті. Жиынға еліміздің түрлі өңірлерінен моноқала әкімдері, өнеркәсіп кәсіпорындарының басшылары және сарапшылар қатысты.
Президент тапсырмасына сәйкес моноқалаларды дамытудың жаңа тәсілдері қарастырылып, олардың әлеуметтік-экономикалық жағдайына 78 көрсеткіш бойынша талдау жүргізілгені айтылды. Кеңесте Ұлттық экономика вице-министрі Бауыржан Омарбеков, Өнеркәсіп және құрылыс вице-министрі Олжас Сапарбеков, Қарағанды облысының әкімі Ермағанбет Бөлекпаев, Екібастұз қаласының әкімі Аян Бейсекин баяндама жасады.
Бүгінде ел аумағында 1,5 миллионға жуық халқы бар 20 моноқала тіркелген. Бұл қалалар елдегі өнеркәсіп өндірісінің 36,4%-ын құрайды. Кеңесте Саран қаласының тәжірибесі мысалға келтіріліп, моноқалаларды үш санатқа бөлу ұсынылды. Әр топқа жеке даму стратегиясы қарастырылып отыр. Олардың қатарында:
-
Инженерлік және әлеуметтік инфрақұрылымды жаңғырту
-
IT, АӨК, туризм мен ғылым салаларында инвестициялық жобаларды іске асыру
-
Көлік дәліздері бойында сервистік қызметті дамыту
-
Индустриялық және шағын өнеркәсіптік аймақтар құру
-
Ұзақмерзімді офтейк-келісімдер тетіктерін қолдану
Екібастұз қаласы экономикасын әртараптандыру мысалында 138,4 млрд теңгенің ферроқорытпа зауыты салынғаны және 800-ден астам жаңа жұмыс орны ашылғаны атап өтілді.
– Моноқалалар өсу нүктесіне айналуы тиіс. Бұл – болашақ индустриясы бастау алатын өңірлер. Біз оларды “жасыл” технологиялар мен креативті экономиканы дамыту алаңы ретінде қарастыруымыз керек. Екібастұз қазіргі таңда көпсалалы қалаға айналып келеді. Ол үшін моноқала мәртебесі енді өзекті емес, – деді Премьер-министр Олжас Бектенов.
Үкімет басшысы моноқалалардың экономикасын әртараптандыруды жеделдетуді және жаңа инфрақұрылымдық саясат құру жұмысын күшейтуді тапсырды.
