Semeytany.kz – Қазақстанда заңсыз жолмен алынған активтерді мемлекетке қайтару арқылы 318 млрд теңгенің әлеуметтік жобалары жүзеге асырылуда. Бұл жөнінде ресми ақпарат жарияланды.
Мемлекет басшысы Қасым-Жомарт Тоқаевтың тапсырмасына сәйкес, қайтарылған қаражат Арнаулы мемлекеттік қорға түсіп, ел аумағында білім беру, медицина, спорт және сумен жабдықтау салаларындағы 400-ден астам нысанның құрылысын қаржыландыруға бағытталуда.
Қазіргі таңда 406 жобаға қаржы бөлінген, оның ішінде:
-
9 білім беру нысаны
-
3 спорт кешені
-
162 денсаулық сақтау жобасы
-
159 сумен жабдықтау жобасы жүзеге асырылып жатыр.
Бұл бастама «Ауылда денсаулық сақтауды жаңғырту» бағдарламасы және таза ауыз сумен қамту жөніндегі ұлттық жоспар аясында қолға алынды. Барлық жобалар әлеуметтік маңызы бар инфрақұрылымды дамытуға бағытталған.
Өңірлердегі ірі жобалар қатарында:
-
Астана қаласында Қ.Мұңайтпасов атындағы жаңа стадион салынып жатыр. Жобада 3598 орын қарастырылған.
-
Алматыда сумен жабдықтауға қатысты 9 жоба іске асуда.
-
Шымкентте «Сайрам көмекші мектеп-интернат-колледжі» тәрбиеленушілеріне 300 орындық жатақхана салынуда.
-
ШҚО-да заманауи Гематология орталығының құрылысы аяқталуда. Мұнда стационар мен қонақ үй, диагностика, кардиология және трансплантация бөлімшелері болады.
-
СҚО-да топтық су құбырларын жаңғырту жұмыстары қарқынды жүргізілуде (Соколов, Булаев, Пресновский және Көкшетау желілері).
-
Қарағанды облысында 51 медициналық нысан – амбулаториялар мен медпункттер салу жоспарланған.
-
Ақмола облысында 38 жоба іске асырылуда. Оның ішінде Аршалы мен Бұланды аудандарында жаңа медициналық мекемелер пайдалануға берілді.
Мемлекет қайтарылған қаражатты әлеуметтік жағдайды жақсартуға жұмсап, азаматтардың өмір сүру сапасын арттыру жолында нақты қадам жасап отыр.
