Semeytany.kz – Абай облысында оқушы орындарының тапшылығын жою және сапалы білімге қолжетімділікті арттыру мақсатында «Келешек мектептері» жобасы қарқынды жүзеге асырылуда. Бұл туралы Абай облысы Білім басқармасы басшысының орынбасары Айжан Курманова Өңірлік коммуникациялар қызметінде өткен брифингте мәлімдеді.
– Бұл – әрбір балаға, ауыл не қала болсын, заманауи және қауіпсіз ортада сапалы білім алуға мүмкіндік беретін стратегиялық жоба. Жоба білім беру инфрақұрылымын жаңғыртып, оқушылардың білім алуына тең мүмкіндік жасауға бағытталған, – деді спикер.
Өткен жылы облыста үш жаңа мектептің құрылысы аяқталды:
-
Қарағайлы шағын ауданында – 1 200 орындық мектеп (қазір 1 683 оқушы білім алып жатыр);
-
Бесқарағай ауылында – 300 орындық мектеп (К.Рысқұлбеков атындағы мектеп ұжымы толық көшірілген, 497 оқушы оқып жатыр);
-
Водный кентінде – 600 орындық мектеп (құрылысы 98%-ға аяқталған, электр қуатына қосылуы шілде айына жоспарланған).
Сонымен қатар, қазіргі уақытта:
-
Аягөз қаласында – 600 орындық,
-
Правый Восточный кентінде – 300 орындық мектептің құрылысы жалғасуда.
Жаңа мектептердің ерекшелігі – қауіпсіздік, инклюзия және шығармашылық ортаға басымдық берілуі. Әр ғимаратта арнайы қажеттіліктері бар балаларға арналған кабинеттер, пандустар, лифттер, демалыс аймақтары мен заманауи шеберханалар қарастырылған.
Айжан Курманованың айтуынша, бұл мектептердің жобасы типтік үлгілермен салыстырғанда кеңірек (15–20%-ға) әрі техникалық жабдықталу деңгейі 4 есе жоғары. Мысалы, Водный мектебіне 96 бейнекамера, турникет, 58 ноутбук, 3D-принтер және басқа да жаңа құралдар орнатылған.
Барлық жаңа нысандар пайдалануға берілген соң, оқыту тек бір ауысыммен жүргізіледі, ал ғимараттар Білім басқармасының теңгеріміне өтеді. Жоба толық іске асқанда, өңірдегі жүздеген оқушы жаңа, қолайлы мектептерде білім алатын болады.
