Semeytany.kz – «Шығыс» өңірлік қолбасшылығында мерзімді әскери қызметін абыроймен аяқтаған сарбаздарға жоғары оқу орындарында тегін білім алуға мүмкіндік беретін сертификаттар табысталды.
Салтанатты шараға сарбаздардың ата-аналары арнайы шақырылып, ұлдарының маңызды сәтіне куә болды. Мемлекеттік қолдауға негізделген бұл бастама жастардың әскери қызметтен кейін әлеуметтік бейімделуіне, кәсіби және білім жолын жалғастыруына жол ашады.
Шара барысында толқулы сәттер де орын алды. Сарбаз Данияр Молдахановтың анасы Еркеш Нұрпейісова өз әсерімен бөлісті:
– Ұлымды әскерге мақтанышпен шығарып салғаным есімде. Бүгін оның қолына білімге жол ашатын сертификат алғанына куә болып, ерекше қуаныш сезімін бастан кешіріп отырмын. Әскер ұлымды шынықтырды, ал мемлекет оған болашаққа жол ашты. Осындай қолдау көрсеткендерге алғысым шексіз, – деді ол.
Іс-шара мерекелік концертпен және ұжымдық естелік суретке түсу рәсімімен аяқталды.
