Semeytany.kz – Абай облысының әкімі Берік Уәли Жарма ауданына жасаған жұмыс сапары аясында Шар қаласындағы бірқатар әлеуметтік және өндірістік нысандарды аралап, олардың жай-күйімен танысты.
Мәдениет үйіне күрделі жөндеу жүргізілуде
Аймақ басшысы алдымен 1960 жылы салынған Шар қалалық мәдениет үйінде атқарылып жатқан жөндеу жұмыстарын көрді. Бұл нысандағы жаңарту «Жол картасы» бағдарламасы аясында жүзеге асуда. Мердігер компания өкілдерінің айтуынша, қазіргі таңда жұмыстың 40 пайызы аяқталған. Облыс әкімі жөндеу жұмыстарының сапасына ерекше мән беріп, құрылысты уақытылы аяқтауды тапсырды.
Жаңғыртылған мектепке оң баға берілді
Сапар барысында әкім Абай атындағы мектеп-балабақша кешеніне де барды. 243 оқушы білім алатын оқу орнында 2023 жылы күрделі жөндеу жүргізілген. Оқу кабинеттері жаңартылып, STEM, химия, биология, физика және робототехника бағытындағы сыныптар жабдықталған. Қазақ тілі пәні кабинеті Абайдың 180 жылдығына орай ашылған. Мектеп дәліздері де ерекше безендірілген. Кешен құрамындағы балабақшада 50 бала тәрбиеленуде. ҰБТ нәтижесі бойынша екі оқушы «Алтын белгіге» ие болған.
Мектеп ішін аралап шыққан Берік Уәли бұл білім ордасын үлгілі жоба ретінде атап, Білім басқармасына басқа мектептерге осы форматты үлгі ету жөнінде тапсырма берді. Сондай-ақ, мектеп алдында жергілікті ақсақалдармен және белсенді азаматтармен кездесіп, Амангелді көшесінің жолын жөндеуге қатысты өтінішті қабыл алды.
– Шар – үлкен елдімекен. Қала мәртебесі бар. Бұл жерде бассейн мен балалар алаңы салынады. Мәдениет үйі жөнделіп жатыр. Амангелді көшесінің жолын да қалпына келтіреміз. Барлық мәселе біртіндеп шешіледі, – деді облыс әкімі.
Өндірістік әлеуетке жоғары баға берілді
Берік Уәли «Қамқор-Локомотив» ЖШС құрамындағы Шар локомотив жөндеу депосына да барды. 1935 жылы құрылған бұл кәсіпорында бүгінде 155 адам тұрақты жұмыспен қамтылған. Орташа жалақы – 300 мың теңгеден асады. Депо жылына 900-ге жуық техникаға қызмет көрсетеді. Кәсіпорында барлық негізгі жөндеу, дәнекерлеу, құрастыру және бақылау цехтары жұмыс істейді.
– Бұл мекеме – Шар қаласының тірегі. Мұнда тұтас теміржолшылар әулеттері жұмыс істейді. Биыл кәсіпорынның 90 жылдығы. Осы мерейтойды лайықты атап өтулеріңізге тілектеспін, – деді Берік Уәли.
Облыс әкімінің сапары Шар қаласындағы әлеуметтік мәселелерге назар аудару және өндірісті қолдау бағытында маңызды шаралармен жалғасты.
