Semeytany.kz – Абай облысындағы Алакөл көлі – еліміздегі ең көрікті әрі туристік әлеуеті жоғары демалыс орындарының бірі. Биылғы маусымда көл жағалауында ауқымды жаңғырту жұмыстары жүргізіліп, туристерге арналған жағдай сапалық жаңа деңгейге көтерілді.
Жағалау инфрақұрылымы жаңартылуда
Алакөлде демалушыларға қолайлы орта қалыптастыру мақсатында облыстық бюджеттен 1,5 млрд теңгеден астам қаражат бөлініп, жағажай инфрақұрылымы жүйелі түрде жаңартылуда. Арбат аймағында сауда алаңдары мен демалыс аймақтарын қамтитын жаңа кеңістік құрылып жатыр. Жағалаудың тазалығы мен тәртібін сақтау үшін 25 модульдік дәретхана, 35 киіну кабинасы, 50 қоқыс жәшігі және 86 бейнебақылау камерасы орнату көзделген.
Жолдар мен көлік қатынасы жақсаруда
Жалпы құны 1,09 млрд теңгеге жуық жобаның аясында көлге апаратын 21 шақырым жол жөнделуде. Бұған қоса, қатты тұрмыстық қалдықтарға арналған полигон салу үшін жобалық-сметалық құжаттама әзірленуде. Көлік қатынасын жақсарту бағытында 2025 жылғы жазғы маусымда «Scat» және «Оңтүстік аспан» әуекомпаниялары арқылы аптасына 19 әуе рейсі орындалмақ. Теміржолмен «Семей – Жалаңашкөл» бағыты іске қосылады. Сонымен бірге, автокөлікпен қатынайтын 9 маршрут ұйымдастырылады.
Қауіпсіздік пен жайлылық – басты назарда
Жағалауда 5 шақырымдық суға шомылатын аумақ арнайы буйлармен белгіленіп, 7 құтқару мұнарасы мен 10 құтқарушы қызмет атқарады. Сонымен қатар, демалушылардың қауіпсіздігін 45 полиция қызметкері және 14 медицина маманы қамтамасыз етеді.
Қосымша қолайлы қызметтер
Көл маңында «Qazaq Oil» жанармай құю бекетінің ашылуы – өңір тұрғындары мен қонақтары үшін тағы бір маңызды жаңалық. Бұл – туристердің жолдағы қолайлылығын арттыратын инфрақұрылымдық қолдау.
Алакөл – табиғаты көркем, қауіпсіз, әрі жайлы демалыс орнына айналуда. Жаңа маусым туристерге барынша қолайлы жағдаймен басталды.
