Semeytany.kz – 22 маусым күні Семей қаласындағы Жеңіс саябағында шекарашылардың ерлігін ұлықтауға арналған патриоттық іс-шара өтті. ҚР ҰҚК Шекара қызметі Абай облысы бойынша департаментінің бастамасымен ұйымдастырылған салтанатты жиынға ардагерлер, сарбаздар мен жас шекарашылар қатысты.
22 маусым – тарихта Ұлы Отан соғысы басталған қаралы күн. 1941 жылы дәл осы күні жауға алғаш қарсы тұрғандар – шекарашылар болатын. Олар шекара шебінде ерлікпен қаза тауып, Жеңіске бастар жолды алғаш болып ашты.
Іс-шара барысында Мәңгілік алауға гүл шоқтары қойылып, ерлікпен көз жұмған шекарашылардың рухына тағзым жасалды. Сап түзеген сарбаздар мен ардагерлердің қатары ел есіндегі ерліктің мәңгілік екенін дәлелдеді.
Жиында ҚР ҰҚК Шекара қызметі Абай облысы бойынша департаментінің бастығы, полковник Асхат Ахметов сөз сөйлеп:
– Қаншама боздақ шекара шебінде жанын беріп, ұрпаққа бейбіт күн сыйлады. Олардың ерлігі – елдіктің белгісі. Біз бұл ерлікті ұмытпай, келешекке жеткізуге тиіспіз, – деді.
Сондай-ақ, «Застава Тарландары» шекарашы ардагерлер ұйымының төрағасы, запастағы подполковник Анарбек Еркешов те жастарға өнеге боларлық сөз арнады. Ол шекарашылардың даңқты жолын ұрпаққа үлгі ету – әр азаматтың борышы екенін атап өтті.
Еске алу рәсімі жастарға отансүйгіштік рух дарытатын тағылымды сабақ болды. Батыр шекарашылардың есімі ел жадында мәңгі сақталып, ерлік рухы ұрпақтан-ұрпаққа жалғаса бермек.
