Semeytany.kz – Мемлекет басшысы Қасым-Жомарт Тоқаевтың тапсырмасымен өтіп жатқан «Заң және тәртіп» апталығы аясында Астанада ҚР Ішкі істер министрлігінің Басқару академиясы ашылды. Салтанатты шараға ҚР Премьер-министрі Олжас Бектенов қатысты.
Академия – құқық қорғау жүйесін жетілдіру, кадрлық әлеуетті күшейту және қоғамдық қауіпсіздікті арттыру бағытындағы маңызды қадам. Олжас Бектенов өз сөзінде жаңа оқу орны құқық қорғау саласындағы институционалдық реформалар мен сервистік модельді дамытуда маңызды рөл атқаратынын атап өтті.
– Академияның құрылуы – Президент жариялаған құқық қорғау жүйесінің даму жолындағы маңызды кезең. Біздің міндетіміз – басқару құзіреттілігі жоғары, стратегиялық ойлай алатын кадрлар даярлау арқылы құқықтық тәртіптің жаңа моделін қалыптастыру, – деді Премьер-министр.
Соңғы жылдары ІІМ құрылымында есірткі қылмысына, киберқауіптерге және тұрмыстық зорлық-зомбылыққа қарсы арнайы бөлімшелер құрылған. Цифрлы инфрақұрылым мен талдамалық база да жаңартылып жатыр.
Академияның заманауи инфрақұрылымы – цифрлы зертхана, «ақылды көзілдірік», робот техникасы, жасанды интеллект көмегімен талдау жүйелері және патрульдік автокөліктерді қашықтан бақылау платформаларымен жабдықталған. Оқу орнында магистратура мен докторантура бағдарламалары арқылы 30-дан астам студент, ал басқарушы құрам бойынша жыл сайын 100-ден астам тыңдаушы білім алады.
Академияның ашылуына Бас прокуратура, ҰҚК, Жоғарғы Сот Кеңесі, Парламент депутаттары, халықаралық ұйымдар мен жеке сектор өкілдері қатысты. Білім ордасы ішкі істер органдарының басқарушы құрамын жаңғыртуға бағытталған маңызды бастама ретінде бағалануда.
