Semeytany.kz — Бүгін облыс әкімі Берік Уәли Ертіс өзені үстімен өтетін Семейдегі аспалы көпірде жүргізіліп жатқан жөндеу жұмыстарының барысын тексерді.
Қазіргі таңда сол жағалаудан оң жағалауға бағытталған бөліктегі асфальт төсеу толық аяқталды. Ескі жабынды мен гидрооқшаулағыш қабаттар алынып, орнына жаңа материалдар мен асфальтбетон жамылғысы төселді.
Облыс басшысы жөндеу сапасын жеке бақылап, дайын бөлікте көлік қозғалысын тезірек ашуды тапсырды. Сонымен қатар, ауыр жүк көліктерінің қозғалысын шектеу туралы ұсыныс білдіріп, 8 тоннадан асатын көліктерге көпірмен өтуге тыйым салынатынын айтты. Бұл мақсатта өткелдің екі шетіне бақылау бекеттері қойылады.
– Жол тек көпір үстінде ғана емес, оған апаратын 600 метрлік жол учаскесінде де жаңартылды. Жұмыстың сәл кешіктірілу себебі – осы. Алайда мұның бәрі тұрғындардың жайлылығы үшін жасалып отыр, – деді Берік Уәли.
Анықтама үшін:
Аспалы көпірдің ұзындығы – 1100 метр, оның ішінде 750 метрі – аспалы аралық, ал қалған 350 метрі – бетонды аралық. Көпір ені – 26 метр. Жөндеу жұмыстарына 80-ге жуық жұмысшы мен 20-дан астам техника жұмылдырылды.
