Semeytany.kz – Абай облысына жұмыс сапарымен келген Оқу-ағарту министрі Ғани Бейсембаев облыс әкімі Берік Уәлимен бірге Семей қаласындағы бірнеше білім беру мекемесінің жай-күйімен танысты.
Министр барған алғашқы нысан – №11 жалпы орта білім беретін мектеп. Мектеп бейімделген үш қабатты ғимаратта орналасқан, қазіргі уақытта мұнда 1411 оқушы оқиды. Соның 296-сы уақытша оқу орнында білім алуда. Жаңа корпус немесе жаңа мектеп салу қажеттілігі туындап отыр.
Ғани Бейсембаев «Балдәурен» балабақшасының жұмысымен де танысты. 1988 жылы салынған бөбекжайда 13 топ бар, 64 адам жұмыс істейді. Мұнда 320 орындық ваучерлік жүйе енгізілген. Балабақшаның материалдық-техникалық базасын жаңарту қажет екенін айтқан облыс басшысы бұл бағытта әкімдік тарапынан қолдау болатынын жеткізді.
Сапар барысында министр №52 жаңа мектептің құрылысын қарап шықты. 600 орындық бұл мектеп «Келешек мектептері» жобасы аясында салынып жатыр. Семей қаласында 4025 оқушыға орын жетіспейді. Жаңа мектеп іске қосылғанда тапшылық 600 орынға азаяды. Сонымен қатар, қала маңындағы Восход ауылының балалары үшін де бұл мектеп үлкен жеңілдік болмақ.
Кейін министр мен аймақ басшысы Мұхтар Әуезов атындағы педагогикалық колледжде білім саласы қызметкерлерімен кездесу өткізді. Жиында облыс әкімі өңірдегі өзекті мәселелерді атады. Атап айтқанда, апатты жағдайдағы 3 мектеп пен жөндеуді қажет ететін Үржар ауылындағы Абай мектебі туралы айтып, министрден қолдау сұрады.
Министр Ғани Бейсембаев өз сөзінде Семейде 1000 орындық жаңа мектеп салу мәселесі қарастырылатынын және Үржардағы мектепке қатысты ұсыныс назарға алынатынын мәлімдеді. Сондай-ақ ауыл мектептерінің жанынан спорт алаңдарын ашу жобасына Абай облысының да қатысатынын жеткізді.
