Semeytany.kz – Ақтөбе облысында өткен «Айбын-2025» XI халықаралық әскери-патриоттық жастар жиынында Абай облысының командалары үлкен жетістікке жетті. Қазақстан Президенті – Қарулы Күштердің Жоғарғы Бас қолбасшысы Қасым-Жомарт Тоқаев қатысқан жиынға Қазақстанмен қатар Әзербайжан, Беларусь, Қырғызстан, Ресей және Өзбекстан елдерінен 800-ге жуық жас жиналды.
Халықаралық деңгейде ұйымдастырылған байқауда 50-ден астам команда әскери, зияткерлік және шығармашылық сайыстарда бақ сынады. Жиын Ұлы Жеңістің 80 жылдығы мен Кеңес Одағының Батыры Әлия Молдағұлованың 100 жылдығына арналды.
Семей қаласындағы Шоқан Уәлиханов атындағы «Жас Ұлан» мамандандырылған мектеп-интернатының командасы әскери мектептер арасында төртінші жыл қатарынан Гран-приді жеңіп алды. Олар «Айбын дарыны» зияткерлік сайысында, «Smart Sarbaz» технологиялық жобалар байқауында және автомат бөлшектеу жарысында 1-орын иеленді. Сонымен қатар, бірнеше спорттық және шығармашылық бағытта 2–3 орынға ие болды.
Жиынға қатысқан Абай облысының тағы бір командасы – «Абай қырандары» әскери-патриоттық клубы да жалпыкомандалық есепте 1-орынды жеңіп алды. Бұл команда да «Smart Sarbaz» байқауында үздік атанып, бірнеше номинацияда жүлдегер атанды. Ал «Жас барлаушы» командасы турникке тартылу жарысында 2-орынға ие болды.
Абай облысының жас патриоттарының бұл жетістігі – өңірде әскери-патриоттық тәрбиенің жүйелі түрде жолға қойылғанының айғағы.
