Semeytany.kz – Шығыс Қазақстан облысындағы бірнеше ауылдың тұрғындары көкөніс пен жеміс ағаштарын қырып бара жатқан құрттарға қарсы шұғыл шара қабылдауды сұрайды. Атап айтқанда, Ұлан ауданына қарасты Белогорский, Асу Бұлақ және Огневка ауылдарында жұрт бау-бақша мен орман жапырағынан түгел айырылуға шақ қалған. Бұл туралы Anyqtime.kz порталы хабарлады.
Тұрғындардың айтуынша, зиянкестер тек бақша өнімдерін ғана емес, шырша мен қарағай сияқты қылқан жапырақты ағаштарды да жайпауда. Кейбіреулер бұл жәндіктерді «биологиялық қаруға» теңеп, мұндай көлемдегі апатты алғаш көруде екенін айтады.
– Құрттар жапырақ, гүл, тіпті қылқанды ағаштарды түгел жеп жатыр. Оларды қолмен теріп үлгеру мүмкін емес. Бұл – тең емес күрес, – дейді ауыл тұрғындары.
Белгілі болғандай, ауылдарда дүкен де жоқ, нан аптасына бір-екі рет қана жеткізіледі. Сондықтан тұрғындар үшін бақша мен орман – жалғыз күнкөріс көзі. Ауыл тұрғыны Татьяна Сутормина бұған дейін гүлдеп тұрған алмасының жап-жалаңаш күйге түскенін көрсетіп, биыл жеміс-жидек, шөп, тіпті қысқы азыққа ештеңе қалмағанын айтты.
– Мен орманда 42 жыл жұмыс істедім. Бірақ мұндай апатты алғаш көруім. Құрттар тіпті қотыршөптің өзін де жеп жатыр. Жойқын жылдамдықпен көбейіп келеді, – дейді орманшы Иван Шаров.
Ауыл тұрғындары құрттардың үйлердің ішіне кіріп, тіпті кейбір тағамдардан да табылып жатқанын айтады. Жәндік тиген қол ісіп, ауырып жатқандар да бар. Осыған байланысты олар құрттардың улы болуы мүмкін екенін айтып дабыл қағуда.
Жергілікті әкімдік мәселе туралы хабардар екенін мәлімдеп, құрттардан сынама алынып, фитосанитарлық қызмет зертханаға жолдағанын хабарлады. Қорытынды шыққан соң нақты шешім қабылданады деп отыр.
Алайда тұрғындар билік өкілдері тым баяу әрекет етіп жатқанын айтып, көз алдында тіршілік атаулы жойылып бара жатқанын алға тартуда.
