Semeytany.kz – Абай облысының әкімі Берік Уәлидің төрағалығымен өткен әкімдік отырысында білім беру саласындағы өзекті мәселелер кеңінен талқыланды. Жиынға облыстық басқарма басшылары мен қала, аудан әкімдері қатысты.
Құрылыс басқармасының басшысы Шыңғыс Риаханов пен Білім басқармасы басшысының міндетін атқарушы Бауыржан Түленовтің мәліметіне сәйкес, биыл өңірде екі жаңа мектеп пайдалануға берілген. Қарағайлыда – 1200, Бесқарағайда – 300 орындық мектеп ашылды. Водный кентіндегі 600 орындық мектеп жаңа оқу жылында іске қосылады. Аягөздегі мектеп құрылысы аяқталуға жақын, ал Шығыс кентінде жаңа мектептің құрылысы енді басталған.
Одан бөлек, алты мектепке қосымша ғимарат салу көзделуде. Алайда кейбір мектептерге қатысты жобаларға қосымша қаржы қажет екені айтылды.
Білім беру мекемелерінің материалдық-техникалық базасын жаңарту мақсатында 2,9 млрд теңгеге күрделі жөндеу жүргізу жоспарланған. Оның ішінде 12 мектептің шатыр, терезе, электр желісі жаңартылады, 85 мектепте ағымдағы жөндеу жұмыстары жүріп жатыр. Алайда бірқатар жұмыстардың кестеден кешігіп жатқаны айтылды.
Облыс әкімі басқарма басшыларына нақты әрі жүйелі есептің жоқ екенін сынға алды.
– Алдағы үш жылда қанша мектеп саламыз? Құрылысы басталып, аяқталмай қалған нысандарды неге назардан тыс қалдырып отырсыздар? Жобалық-сметалық құжаттар дайындалып жатыр дейді, бірақ оны қаржыландыру жоспары жоқ. Бірінші кезекте апатты мектептердің мәселесін шешуіміз керек. Водный мен Аягөздегі мектептер 1 қыркүйекте ашылуы тиіс, – деді Берік Уәли.
Аймақ басшысы облыс әкімінің орынбасары Серік Төленбергеновке мектеп құрылысын бақылауға алуды, «Самұрық-Қазына» қорымен бірлесіп жұмыс істеуді тапсырды. Сонымен қатар білім басқармасына жөндеу жұмыстарын уақтылы аяқтауды жүктеді. Қала, аудан әкімдеріне мектеп маңында бей-берекет қоқыс орындарына жол бермеу, құрылыс қалдықтарын арнайы орындарға шығару талаптарын орындау міндеттелді. Бұл талап бұзылған жағдайда мердігерлерге айыппұл салынатыны ескертілді.
