Semeytany.kz – Семей қаласында биылғы жылы жол жөндеу жұмыстары бұрын-соңды болмаған қарқынмен жүріп жатыр. Қалалық жолаушылар көлігі және автомобиль жолдары бөлімінің мәліметінше, биыл 40 шақырымнан асатын 52 көшенің жолы жаңартылмақ. Оның ішінде 36 көше алғаш рет асфальтталады.
Жол салу және жөндеу жұмыстары қаланың бірнеше шағын ауданын қамтып отыр. Бұл бағыттағы жобалар алты бағыт бойынша іске асуда және жалпы ұзындығы 23 шақырым жолға жаңа төсем төсеу жоспарланған. Сонымен қатар, елді мекендердегі көше жолдарын да ретке келтіру жұмыстары қатар жүріп жатыр.
Қаланың ішкі жолдарын жөндеу көктемде басталған. Қазіргі таңда Ертістің сол жағалауындағы Крестьянская көшесінде асфальт төсеу жұмыстары қызу жүргізілуде. Бұл туралы Абай облысының Өңірлік коммуникациялар қызметі ұйымдастырған көшпелі баспасөз мәслихаты барысында айтылды.
– Қала тұрғындарының өтініштері назарға алынып, ойық-шұңқырлар жамалуда, асфальт төсеуге дайындық жұмыстары 9 көшеде жүріп жатыр. Жалпы, Семейде жолдарды ретке келтіру жұмыстары жоспарлы әрі қарқынды жүргізілуде, – деді қалалық жолаушылар көлігі және автомобиль жолдары бөлімінің бас маманы Әділбек Увасилов.
Жөндеу жұмыстарының сапалы әрі уақтылы аяқталуы – қала тұрғындарының өмір сүру сапасын жақсартуға бағытталған маңызды қадам.
