Semeytany.kz – Бесқарағай ауданында табиғатты аялауға бағытталған маңызды экологиялық шара өтті. «Бесқарағайдың інжу-маржанын сақтайық» атты акция Шипалы көлінің жағасын тазарту және тұрғындар арасында экологиялық сана-сезімді арттыру мақсатында ұйымдастырылды.
Экологиялық бастамаға ауданның еріктілері мен жастар ұйымдары, оның ішінде «Жасыл ел» еңбек жасағының мүшелері атсалысты. Жалпы саны 30-ға жуық белсенді азамат көл маңын қоқыстан тазартып, табиғатты қорғауға өз үлесін қосты.
Іс-шара барысында Бесқарағай ауданы жастар ресурстық орталығының директоры Арыстан Сабыров акцияның маңыздылығын атап өтті.
– Табиғатты аялау — әрбір азаматтың ортақ міндеті. Бұл көлдер — тек ауданымыздың емес, бүкіл еліміздің табиғи байлығы. Осындай шаралар арқылы жастарды туған жерге жанашыр болуға тәрбиелейміз. Бұл — бір реттік акция емес, жалғасуы тиіс құндылық, – деді ол.
Айта кетейік, бұған дейін де аудан аумағында табиғатты қорғауға бағытталған осындай шаралар ұйымдастырылып келеді.
