Semeytany.kz – ҚР Мәжілісінің депутаты, «AMANAT» партиясы фракциясының мүшесі Нұртай Сабильянов Абай облысы Жарма ауданына жасаған сапары аясында бірнеше ауылдың тұрғындарымен кездесті. Депутат Қоңырбиік, Кіші Қарасу және Салқынтөбе ауылдарындағы елдің мұң-мұқтажын тыңдап, өзекті мәселелерді талқылады.
Қоңырбиік: дәрігер керек, мектепке спортзал қажет
Бұл ауылда халық интернет желісінің жоқтығын, медициналық пункттің ашылмағанын және дәрігер тапшылығын алға тартты. Сонымен қатар, жедел жәрдем көлігі бөлінсе, мектеп жабылмаса, оның жанынан спортзал салынса деген ұсыныстар айтылды. Ауыз су мәселесі де қозғалды. Қазір ауылда блок-модульді станция арқылы таза су тартылғанымен, тұрғындар бұл жүйенің тұрақты жұмыс істеуіне алаңдайтынын білдірді.
Кіші Қарасу: инфрақұрылым мен жеңілдіктер сұралды
Ауыл тұрғындары үшін басты мәселе – жол. Жалпы 9,2 шақырым жолдың тек 1,8 шақырымы ғана жақсы жағдайда. Қалғаны тозған. Сондай-ақ, Семей полигонынан зардап шеккендерге жеңілдік беру, әйелдердің зейнет жасын төмендету, интернет сапасын арттыру, жедел жәрдеммен қамту, азық-түлік бағасын тұрақтандыру, мектепке спортзал қажет екені айтылды. Дегенмен, ауыз су толық тартылған. Су құбыры желісінің ұзындығы – 11 шақырым.
Салқынтөбе: уақыт белдеуі мен жарық мәселесі
Бұл елдімекенде де көтерілген мәселелер аз емес. Жол жөндеуден бастап, көше жарығы, мектептегі спортзал, электр желілерін жаңарту, баспана салуға мүмкіндік жасау және уақыт белдеуін өзгерту мәселелері айтылды. Тұрғындар азық-түлік бағасын реттеуге де назар аударуды сұрады.
Депутаттың жауабы қандай болды?
Нұртай Сабильянов елдің өтінішін мұқият тыңдап, бәрі хаттамаға енгізіліп, Үкімет пен тиісті мекемелерге жолданатынын айтты.
– Ауыл – елдің тірегі. Инфрақұрылымды жақсарту, медицина мен білім сапасын арттыру – біздің басты міндетіміз. Көтерілген әр мәселе ескерусіз қалмайды, – деді депутат.
Сапар қорытындысы бойынша нақты шешімдер қабылдануы үшін ұсыныстар тиісті органдардың қарауына беріледі.
