Semeytany.kz – Тәжікстан астанасы Душанбе қаласында өткен Батыс Азия чемпионатында Абай облысының жас гроссмейстері Думанұлы Сұлтанбейбарыс классикалық шахматтан алтын медаль жеңіп алды. 13 елдің мықтылары қатысқан байрақты бәсекеде ол 16 жасқа дейінгі санатта жеңімпаз атанды.
Бұл жеңіс – Сұлтанбейбарыстың қажырлы еңбегі мен тұрақты даму жолындағы тағы бір ірі белесі. 15 жастағы спортшы бұған дейін де Азия чемпионатында мектеп оқушылары арасында топ жарып, халықаралық аренада өзін бірнеше рет дәлелдеген. Биылғы додада ол FIDE туы астында өнер көрсетіп жүрген Ресейдің шахматшыларын да артта қалдырды.
Жас шахматшының бұл табысына оның жеке дайындықтан бөлек, бапкерлер құрамының, әсіресе бас жаттықтырушы Б.Хабдестің еңбегі зор үлес қосқан.
Қазіргі уақытта Сұлтанбейбарыс Ташкент пен Абу-Дабиде өтетін халықаралық шеберлік турнирлеріне, сондай-ақ қазан айында Албанияда өтетін Әлем чемпионатына дайындалып жатыр.
Абайлық жас чемпионды жарқын жеңісімен құттықтай отырып, алда алар асулары биік болсын деп тілейміз. Оның табандылығы мен таланты Қазақстан шахматының болашағына деген зор үміт ұялатады.
