Әлеумет
Semeytany.kz – Абай облысында 2025 жылдың алғашқы алты айында заңсыз айналымнан 303 келіден астам есірткі мен психотроптық заттар тәркіленді. Бұл туралы Өңірлік коммуникациялар қызметінің баспасөз алаңында өткен жиында облыстық Полиция департаментінің Есірткі қылмысына қарсы іс-қимыл басқармасы бастығының орынбасары, полиция подполковнигі Берікжан Абылғазинов мәлім етті.
Спикердің айтуынша, жартыжылдық ішінде өңірде 55 есірткі қылмысы мен 61 әкімшілік құқықбұзушылық тіркелген. Оның ішінде 44 іс – есірткі мен психотроптық заттарды таратуға, ал 30-ы – аса ауыр санаттағы қылмыстарға жатады.
– Тәркіленгендердің басым бөлігін марихуана, гашиш пен синтетикалық есірткілер құрайды. Былтырғы осы кезеңмен салыстырғанда анықталған құқықбұзушылықтар саны үш есеге көбейді, – деді Берікжан Абылғазинов.
Сонымен қатар, «Қарасора–2025» жедел-алдын алу шарасы барысында бір айда 22 дерек тіркеліп, 155 келіден астам есірткі заттары тәркіленген. Шу, Алматы және Павлодар бағыттарынан жеткізілуі мүмкін болған үш ірі арна тоқтатылып, 19 адам қамауға алынды.
Полиция өкілінің мәліметінше, күрес тек қылмыстық іс-шаралармен шектелмей, алдын алу бағытында да жалғасып жатыр. Жыл басынан бері өңірде 273 профилактикалық іс-шара ұйымдастырылған. Олардың қатарында оқу орындарындағы түсіндіру жұмыстары, деректі фильмдер көрсетілімі, флешмобтар мен жастармен кездесулер бар. Іс-шаралар «Спорт – есірткіге қарсы!» ұранымен өткен.
