Әлеумет
Semeytany.kz – Абай облысында қаржы пирамидаларының жолын кесу бойынша белсенді жұмыстар жүргізіліп жатыр. Іс-шаралар Мемлекет басшысының тапсырмасына және «Заң және тәртіп» идеологиялық науқанына сәйкес жүзеге асуда.
Облыс құрылған сәттен бастап Экономикалық тергеп-тексеру департаменті 10 қаржы пирамидасының заңсыз әрекетін тоқтатқан. 2024 жылы Bitlime, Magis, Chia Tai Tiahging және Eolus секілді жобалар әшкереленген. Нәтижесінде 197 салымшы зардап шегіп, келтірілген залал көлемі 88 миллион теңгеге жеткен. Оның 3,4 миллионы өтеліп, 30 миллион теңгеден астам мүлік тәркіленген.
– Қаржы пирамидаларын ұйымдастырушылардың белсенділігі жылдан-жылға артып келеді. Адамдарды тарту жолдары да агрессивті сипатқа ие бола бастады. Біздің мақсат – тек кінәлілерді жауапқа тарту емес, азаматтарды мұндай схемаларға араласудың қауіптілігі туралы дер кезінде ескерту, – деді департамент басшысы Медет Орынбасаров.
Алдын алу жұмыстары да назардан тыс қалмаған. Департамент мамандары өңір тұрғындарымен, студенттермен және кәсіпкерлермен кездесулер өткізіп, күмәнді жобалардың белгілерін түсіндіруде. Оның ішінде: кепілдіксіз жоғары табыс уәде ету, лицензияның болмауы, жаңа салымшылар есебінен төлем жасау және психологиялық қысым көрсету тәсілдері бар.
Айта кетейік, ҚР Қылмыстық кодексінің 217-бабы бойынша қаржы пирамидасын құру және оған жетекшілік ету – қылмыстық құқық бұзушылық. Мұндай әрекет үшін 3 000 АЕК-ке дейін айыппұл немесе үш жылға дейін бас бостандығынан айыру жазасы қарастырылған. Егер қылмыс ұйымдасқан топ арқылы жасалса, жаза бес жылдан он жылға дейін түрме және мүлікті тәркілеу түрінде ауырлайды.
Экономикалық тергеп-тексеру департаменті тұрғындарды барынша сақ болуға, күмәнді жобаларға ақша салмауға, несие алып, инвестиция жасамауға, компаниялардың лицензиясын мұқият тексеруге шақырады. Күдік тудырған жағдайда, Қаржылық мониторинг агенттігінің 1458 нөміріне немесе Telegram-дағы @baiqa_piramida боты арқылы хабарласуға болады.
