Әлеумет
Semeytany.kz – Абай облысының әкімі Берік Уәли Семей қаласындағы №42 жалпы орта білім беретін мектепке барып, білім ошағының жағдайымен танысты. 1974 жылы бейімделген ғимаратта орналасқан мектепте бүгінде 287 оқушы білім алып жатыр. Ал жанындағы интернатта 120 бала тәрбиеленуде.
Мектеп басшылығы аймақ басшысына бірқатар өзекті мәселелерді жеткізді. Атап айтқанда, мектеп аумағы қоршалмаған. Бұл мәселені шешу үшін жобалық-сметалық құжаттама әзірленген. Сонымен қатар интернат ғимараты үш подъезден тұрады, бірақ олардың тек біреуі ғана қолданыста. Қалған екі подъез бос тұр. Мектеп ұжымы осы бос тұрған бір блокты қайта ашып, күрделі жөндеу жүргізіп, интернатты кеңейтуді ұсынды. Бұған қоса, тәрбиеленушілер үшін спорт алаңы салу қажеттігі де көтерілді.
Берік Уәли интернаттың жұмыс істеп тұрған және бос тұрған бөліктерін аралап көріп, жағдаймен жіті танысты. Облыс әкімі Семей қаласы әкімдігі мен Білім басқармасына мектеп аумағын қоршау мәселесін шешуді, интернаттың бос тұрған бөлігіне техникалық зерттеу жүргізіп, жобалық-сметалық құжаттама әзірлеуді және тиісті ұсыныс беруді тапсырды.
