Әлеумет
Semeytany.kz – Абай облысының әкімі Берік Уәли Семей қаласындағы Бейбітшілік аралында орналасқан облыстық балалар биологиялық орталығына барып, мекеменің тыныс-тіршілігімен танысты. Бұл – өңірдегі экологиялық-биологиялық бағыттағы жалғыз мектептен тыс ұйым.
Қазіргі таңда орталықта 776 бала мен жасөспірім қатысатын 60 үйірме жұмыс істейді. Жалпы аумағы 2,56 гектарды құрайтын орталықта 6 оқу зертханасы, акт залы, қысқы павильон, жазғы қоршаулар мен маусымдық жылыжай бар. Сонымен қатар экологиялық байқаулар, экспедициялар мен түрлі іс-шаралар ұйымдастырылады. Жазғы маусымда негізінен көпбалалы және аз қамтылған отбасылардан шыққан 600-ден астам бала күндізгі лагерьде демалады. Жыл сайын 160 мыңға жуық адам орталыққа экскурсия жасап келеді.
Мекеме жануарлар әлемін таныту бағытында да белсенді жұмыс істейді. Қазіргі таңда мұнда 454 түрлі жануар бар. Орталықта 50 қызметкер еңбек етеді.
2022–2023 оқу жылында шаруашылық кіріс есебінен 9,5 миллион теңгеге жуық қаражатқа оқу ғимаратының шатыры мен қасбеті, қысқы павильон жөнделген. Сонымен қатар орталық жоғары оқу орындарымен келісім негізінде студенттер үшін өндірістік тәжірибе алаңы ретінде де қолданылады. Мұнда Шәкәрім университеті, Семей медицина университеті, Авиценна және Шәкәрім жоғары колледжінің студенттері тәжірибеден өтеді.
Орталық қызметкерлері облыс әкіміне оқушыларды іс-шараларға өз көліктерімен тасымалдап жүргендерін айтып, көлік мәселесін шешуге қолдау көрсетуді сұрады.
Берік Уәли орталықты аралап, қызметімен танысты. Аймақ басшысы мекеменің аумағы 2,6 гектардан 9 гектарға дейін кеңейтілгенін атап өтті. Қала әкімдігіне бұл аумақты абаттандырып, Этноауыл жағынан қосымша кіру жолын ашуды тапсырды.
– Бұл орталық оқушылардың жан-жақты дамуына және қосымша білім алуына үлкен мүмкіндік беріп отыр. Жұмысты осы бағытта жалғастыру қажет, – деді облыс әкімі.
