Әлеумет
Semeytany.kz – Абай облысының әкімі Берік Уәли Бесқарағай ауданына сапары барысында жергілікті тұрғындарды жеке қабылдап, олардың талап-тілектерін тыңдады. Кездесу кезінде көтерілген негізгі мәселелер – ауыз су, жол, көше жарығы және спорт нысандарының құрылысына қатысты болды.
Атап айтқанда, Кривинка мен Мостик ауылдарына су құбыры тарту, Канонерка–Белокаменка бағытындағы жолды жөндеу, Долон мен Канонерка ауылдарының көшелерін жарықтандыру сынды ұсыныстар айтылды. Сонымен қатар Қоянбай ауылына спорт модулі салу және Бозталға дейінгі 18 шақырым жолды жөндеу мәселесі де тұрғындар тарапынан көтерілді.
Берік Уәли бұл мәселелерді назардан тыс қалдырмай, тиісті басқарма басшыларына нақты тапсырмалар берді. Әр ұсынысты жеке бақылауына алғанын айтқан облыс әкімі ауылдағы инфрақұрылымды жақсарту – басты мақсат екенін жеткізді.
– Қабылдауда көтерілген мәселелермен жақсы таныспын. Жол, су, жарық – халық үшін ең маңызды қажеттіліктер. Ауылдардың тұрмыс сапасын арттыру үшін алдымен инфрақұрылымды дамыту қажет. Биыл облыста су жүйелерін жаңғырту бойынша 28 жоба іске асырылады. Бұл мақсатқа 11,3 млрд теңге бөлінген. Оның 5,1 млрд теңгесі Бесқарағай ауданындағы бірқатар елді мекендерге бағытталады. Мәселелерді кезең-кезеңімен шешеміз, – деді облыс әкімі.
Айта кетейік, облыс әкімінің қабылдауына дейін басқарма басшылары да аудан тұрғындарын қабылдап, олардың сұрақтарына жауап берген.
