Semeytany.kz – Абай облысының әкімі Берік Уәли Бесқарағай ауылындағы балалар-жасөспірімдер спорт мектебіне барып, мекеменің бүгінгі ахуалымен танысты. 1978 жылы салынған ғимаратта қазіргі таңда 10 қызметкер жұмыс істейді, ал 82 бала еркін күрес пен қазақ күресі секцияларына қатысуда.
Спорт мектебі бүгінгі күні күрделі жөндеуді қажет етеді. Ғимарат салынғалы бері ауқымды жөндеу жұмыстары жүргізілмеген. Мекеме өз күшімен тек косметикалық жөндеулер жасаған. Ал бүгінде жылыту жүйесін толық жаңарту, ескі терезелерді ауыстыру, душ бөлмелерінің тақтатасы мен еден жабындысын жаңарту, сондай-ақ сантехникалық және электр жүйелерін толық ауыстыру қажет. Бұл жұмыстарға арналған жобалық-сметалық құжаттама дайындалған.
Берік Уәли спорт мектебін аралап көріп, мекеменің техникалық жағдайымен жіті танысты. Аймақ басшысы нысанды жаңғырту қажеттігін айтып, тиісті қолдау көрсетілетінін жеткізді.
– Балалардың спортпен алаңсыз айналысуы үшін барлық жағдайды жасауымыз керек. Спорт мектебін күрделі жөндеуден өткізуге әкімдік тарапынан тиісті қолдау көрсетіледі, – деді облыс әкімі.
