Semeytany.kz – Абай облысында мүлік пен жер салығының мөлшері артты. 2024 жылға арналған төлем мерзімі 1 қазанға дейін белгіленген. Бұл туралы өңірлік коммуникациялар қызметінде өткен баспасөз мәслихатында облыстық мемлекеттік кірістер департаментінің өкілі Әсем Тұрлыбекова мәлімдеді.
Спикердің айтуынша, тұрғын үйдің бір шаршы метрі үшін базалық құн 12 000 теңгеден 36 000 теңгеге дейін көтерілген. Жер учаскесіне қатысты базалық ставка да 0,39 теңгеден 0,58 теңгеге ұлғайды. Бұған дейін мұндай салық мөлшерлемелері тек облыс орталықтары үшін қолданылған болса, енді Семей қаласының әкімшілік мәртебесіне сай осындай талаптар енгізілген.
Сонымен қатар, әлеуметтік осал топтар бұрынғыдай кейбір салықтардан босатылады. Бұл туралы Өндірістік емес төлемдер басқармасының бас маманы Еркебұлан Нүкебаев түсіндірді. Жеңілдіктер Кеңес Одағының Батырлары, Социалистік Еңбек Ерлері, соғыс ардагерлері мен оларға теңестірілген азаматтарға, көпбалалы аналар мен мүгедектігі бар балаларды тәрбиелеп отырған ата-аналарға және жалғызбасты зейнеткерлерге қатысты.
Алайда, Семейдің жаңа мәртебесіне байланысты мүлік құнының бағалануы өзгеріп, жеңілдік шегі (1000 немесе 1500 АЕК) асып кеткен жағдайда, артық сомаға салық салына бастайды.
— Кейбір азаматтар базалық құн үш есе артты деген жаңсақ пікірге еріп жүр. Бірақ салық мөлшері мүлік құнына және салық ставкаларына байланысты жеке есептеледі. Сондықтан нақты сома әр адамға жеке есеппен анықталады, — деді Нүкебаев.
Салық мөлшерін білу үшін e-Salyk Azamat мобильді қосымшасын, kgd.gov.kz сайтындағы жеке кабинет арқылы немесе Kaspi.kz пен Homebank қосымшаларын пайдалануға болады.
