Semeytany.kz – Абай облысының әкімі Берік Уәлидің төрағалығымен өткен кеңейтілген аппараттық кеңесте әлеуметтік маңызы бар азық-түлік бағасының өсуіне жол бермеу, ауылдық медициналық нысандар құрылысы және мемлекеттік кәсіпорындардың қаржылық жағдайы сияқты өзекті мәселелер қаралды.
Кәсіпкерлік және индустриялық-инновациялық даму басқармасының басшысы Айбек Рахымбековтің мәліметінше, 2025 жылғы 1 шілдедегі жағдай бойынша облыста әлеуметтік маңызы бар азық-түлік бағасының индексі 100,1% деңгейінде тіркелген. Жыл басынан бері баға өсімі 109,9%-ды құраған. Сәбіз, пияз, ұн, тұз, тауық еті мен айран сынды өнімдердің бағасы сәл көтерілгенімен, жұмыртқа мен қырыққабат арзандаған. Нан, май, күріш, сүт пен қант бағасы республикадағы орташа көрсеткіштен аспаған.
Бағаны тұрақтандыру мақсатында «Семей» әлеуметтік-кәсіпкерлік корпорациясы 1,8 млрд теңгеге 9 түрлі тауар бойынша келісімшартқа отырған. Сонымен қатар, жаз мезгіліндегі маусымаралық кезеңге қосымша өнім жеткізуге өтінім берілген.
Кеңес барысында облыс әкімі қала мен аудан әкімдеріне азық-түлік бағасының негізсіз өсуіне жол бермеуді, тұрақты мониторинг жүргізуді тапсырды. Сондай-ақ «Семей» әлеуметтік-кәсіпкерлік корпорациясы мен Семей қаласының әкімдігіне әлеуметтік дүкендер санын көбейту міндеттелді. Ауыл шаруашылығы басқармасына ауыл шаруашылық жәрмеңкелерін жүйелі түрде өткізу тапсырылды.
