Semeytany.kz – Абай облысының әкімі Берік Уәли Қытайдың Xinjiang Huayuan Holding Group Co. Ltd корпорациясының басшысы Ли Цзюнь бастаған делегациямен кездесті. Екі тарап Семей қаласында жаңа ықшам аудан салу және индустриялық аймақты кеңейту жобалары бойынша бірлесіп жұмыс істеу жайын талқылады.
Кездесуде облыс басшысы Шыңжаңға жасаған жұмыс сапары барысында қол қойылған меморандумдар жайлы сөз қозғап, шетелдік инвесторларға Семейдің инвестициялық әлеуетін таныстырды. Әкімнің айтуынша, қазір индустриялық аймақтың көлемін 600 гектарға дейін ұлғайту жоспарланған.
Қытайлық делегация Семейде бой көтеретін жаңа ықшам ауданмен танысып, өз елдеріне оралған соң нақты жобалар ұсынуға ниетті екенін айтты. Ли Цзюнь инфрақұрылым реттелсе, құрылысқа кірісуге дайын екенін жеткізді.
Облыс басшысы әкімшілік-іскерлік орталықтың тұжырымдамасы әзірленіп жатқанын, бұл ауданға заманауи қонақүй, жылу қазандығы, тұрғын үйлер қажет екенін атап өтті. Сонымен қатар, қытайлық компанияны «Smart City» жобасына серіктес болуға шақырды.
Xinjiang Huayuan Holding Group Co. Ltd – тұрғын үй құрылысы, шығыс медицинасына арналған дәрі-дәрмек өндіру және жылумен қамту салаларында Қытайда көш бастап тұрған ірі корпорация.
