Semeytany.kz – Беларусь елінің Минск облысында өтіп жатқан «Достастықтың балалары» атты халықаралық мәдени-танымдық форумға Абай облысының оқушылары қатысуда. Шара 7–16 шілде аралығында «Зубренок» ұлттық білім беру-сауықтыру орталығында өтуде.
Бұл форум – достастық елдері жастарының басын қосатын маңызды халықаралық алаң. Қатысушылар түрлі елдердің мәдениетін танып, шығармашылық пен көшбасшылық қабілеттерін дамытады. Сонымен қатар, өзара түсіністік пен достықты нығайтуға бағытталған арнайы бағдарламалар ұйымдастырылған.
Қазақстан атынан форумға Абай және Шығыс Қазақстан облыстарының делегациялары қатысып жатыр. Форум аясында мәдени күндер, зияткерлік ойындар, шығармашылық шеберлік сабақтары, тарихи экскурсиялар мен ашық пікірталас алаңдары өтеді.
12 шілде күні форумда Қазақстан күні аталып өтпек. Бұл күні Абай облысының жас өкілдері ұлттық дәстүрлерімізді таныстырып, өнерлерін ортаға салады.
