13 шілде – Балықшылар күніне орай Абай облысында өзендер мен су қоймаларын тазалау мақсатында экологиялық акция ұйымдастырылды. Бұл іс-шара «Таза бейсенбі» бастамасының аясын кеңейтіп, су экологиясын қорғауға бағытталды. Абай облысының бірнеше елді мекенінде өткен іс-шара партия мүшелері мен өңір тұрғындарын табиғатты қорғауға және тазалықты сақтауға үндеп, олардың бірлігі мен жауапкершілігін көрсетті.
Жарма ауданы Қалбатау ауылында орталық алаң мен қоғамдық орындарда тазалық жұмыстары жүргізіліп, оған 35 адам қатысты. Сонымен қатар, Ортабұлақ ауылының табиғи бұлақ маңын тазалауға 15 адам жұмылдырылды. Бұл екі елді мекенде жалпы 50 адам табиғат тазалығы үшін еңбек етті. «Ортабұлақ ауылындағы табиғи бұлақ маңында өткізілген акцияға партияластарымыз бен әріптестеріміз белсенді қатысты. Мұндай игі бастамалар партия мүшелерін біріктіріп, табиғатқа деген жауапкершілікті арттырады», – дейді партиялық топ жетекшісі Шнар Құмашева.
Сонымен қатар, Бесқарағай ауданы, Қарабас ауылдық округінде орналасқан Шипалы көлі жағалауында өткен акцияға 25 адам қатысып, жалпы 3,5 гектар аумақты қоқыстан тазалады. Шамамен 20 қап қоқыс арнайы жинау орындарына шығарылды. Барлық елді мекендердегі қатысушылардың жалпы саны – 100 адамды құрады. Әрбір акция – болашақ ұрпаққа аманат еткен табиғатымызға деген қамқорлық екендігін Бесқарағай аудандық Жастар Ресурстық орталығының директоры Арыстан Сабыров атап өтті.
Үржар аудандық партия филиалының жас белсенділері Үржар ауылындағы «Қайыңды бақ» аумағындағы өзен арналарын тазалап, қоқыстарды шығарды. Тазалық жұмыстарының нәтижесінде 1 гектарға жуық аумақ тазаланып, 35 қап қоқыс шығарылды. Өңір тұрғындары таза табиғаттың маңыздылығын түсініп, оны сақтау үшін бірлесе әрекет етуде.
