Semeytany.kz – Мемлекет басшысының Алакөл жағалауындағы туристік инфрақұрылымға қатысты сынынан кейін Абай облысы әкімінің тапсырмасымен облыс әкімінің орынбасары Серік Түленбергенов Мақаншы ауданына жұмыс сапарымен барды. Ол аудан басшылығы мен жауапты мекемелер өкілдерімен бірге көл жағасында шұғыл кеңес өткізіп, демалушылар үшін қолайлы жағдай жасау, тазалық пен қауіпсіздік мәселелерін талқылады.
Қауіпсіздік пен тазалық күшейеді
Көл жағасында құқық қорғау органдарымен бірлескен рейдтер ұйымдастырылып, тәртіп бұзғандарға шара қолданылады. Әсіресе моторлы қайықтармен қызмет көрсететіндерге қатысты бақылау күшейеді. Сонымен қатар, жағалау маңында қоқыс тастаған сауда орындары мен демалыс базаларына айыппұл салынады.
Инфрақұрылымға 658 миллион теңге бөлінді
Алакөлдің Абай облысына тиесілі жағалауында соңғы жөндеу жұмыстары 2018 жылы жүргізілген. Биыл осы олқылықты жою мақсатында облыстық бюджеттен 658 млн теңге бөлініп отыр. Бұл қаржыға Арбат алаңы (108,9 млн тг) мен жаңа қоғамдық кеңістік (171,6 млн тг) жөнделіп, жағалауды абаттандыру (107,5 млн тг) жұмыстары атқарылуда. Жағажайға 25 киім ауыстыратын орын, 50 контейнер, 2 биотуалет орнатылған. 7 пирстің 3-еуі дайын, жарықтандыру мен құтқару мұнаралары іске қосылған.
Қауіпсіздік үшін жаңа нысандар салынып жатыр
Жағажай аумағында құтқару станциясының құрылысы басталды. Бұл нысан алғашқы көмек көрсету, төтенше жағдайлардың алдын алу және адамдардың қауіпсіздігін қамтамасыз ету үшін маңызды. Сонымен қатар, Қабанбай ауылында екі өрт сөндіру көлігіне арналған өрт сөндіру депосының құрылысы жүргізіліп жатыр.
Қоқыс пен қалдықтарды шығару жүйесі жетілдірілуде
Жағалауға қосымша 100 контейнер мен 75 урна қойылып, жалпы контейнер саны 110-ға жетті. Арбат аумағында тазалық әр 30 минут сайын, ал жағалауда күніне үш рет жүргізіледі. Қалдықтарды өңдеуге арналған полигон құрылысына қажетті құжаттар дайындалуда.
Әжетханалар мен электр желілері
Биыл санитарлық тораптар саны 8-ден 18-ге дейін көбеймек. Қазірдің өзінде 10 санитарлық торап орнатылды. Ал электр қуатын арттыру үшін жаңа «Алаколь» қосалқы стансасы мен жоғары кернеулі желілердің құрылысы 2026 жылдың қазан айына дейін аяқталады деп жоспарлануда.
Су көліктеріне бақылау артады
Жағажай аумағында 5 құтқару мұнарасы жұмыс істеп тұр, 6 құтқарушы күнделікті кезекшілік етеді. Төтенше жағдайлар министрлігі мен көлік инспекциясы су көліктеріне тұрақты рейд жүргізіп, 30 су көлігі тексеріліп, 12 әкімшілік хаттама толтырылған.
Кәсіпкерлермен түсіндіру жұмыстары жүргізілді
Катер, шезлонг, асхана мен демалыс базаларын басқаратын кәсіп иелерімен салық және кассалық аппаратты пайдалану мәселелері түсіндірілді.
Абай облысы әкімдігі Президент тапсырмасына сәйкес Алакөл жағалауындағы жағдайды жақсарту үшін кешенді жұмыстарды жалғастыра беретінін мәлімдеді.
