Semeytany.kz – Абай облыстық Геологиялық барлау колледжінде мектеп оқушыларына арналған жас геологтардың II Республикалық далалық олимпиадасы ресми түрде ашылды. Жарыс 8–15 шілде аралығында колледж аумағында және Қарауыл шоқы оқу полигонында өтпек. Ал олимпиаданың жабылу рәсімі 14 шілдеге жоспарланған.
Геологияға ерте қызығушылық – болашақ маманға бағыт
Олимпиаданың басты мақсаты – жасөспірімдердің геология саласына қызығушылығын оятып, кәсіби бағдар беру, сондай-ақ жер қойнауын тиімді пайдалануға деген жауапкершілікті қалыптастыру.
Биылғы додаға еліміздің әр аймағынан 15 команда қатысып отыр. Жас геологтар палеонтология, минералогия, петрография, магнитометрия, гидрогеология, мұнай мен газды іздеу, геологиялық қима жасау, шлихті сынау және дала жағдайында тұрақ ұйымдастыру сияқты бағыттар бойынша білім-білігін сынайды.
Білім гранттары мен кәсіби қолдау
Салтанатты ашылу рәсімінде демеуші компаниялар мен сала өкілдері қатысушыларға сәттілік тілеп, құттықтау сөз сөйледі. Олимпиада нәтижесінде жекелеген пәндер бойынша үздік нәтиже көрсеткен оқушылар Satbayev University, ҚБТУ, Атырау мұнай және газ университеті мен Қарағанды техникалық университетінің гранттарына ие болады.
Ұйымдастырушылар мен қолдаушылар
Олимпиада ҚР Геология комитетінің қолдауымен «Жас геолог» корпоративтік қоры және Геологиялық барлау колледжінің ұйымдастыруымен өтуде. Демеушілер қатарында Kazakhmys, ERG, Kazzinc, Yer-Tai, Геокен, «Алел» қаржы-инвестициялық корпорациясы, Ембімұнайгаз, ProLabSupport және Solidcore Resources компаниялары бар.
Қазылар алқасы мен кәсіби тәлім
Қазылар құрамына жоғары оқу орындарының профессор-оқытушылары, өндіріс саласындағы жетекші мамандар мен колледж ұстаздары кірді. Олар қатысушылардың білімін әділ бағалап, үздіктерді анықтайды.
Жас геологтар олимпиадасы – бұл тек кәсіби байқау ғана емес, сонымен қатар жас ұрпақтың туған жерге деген сүйіспеншілігін оятатын, патриоттық сезімді нығайтатын тағылымды алаң.
