Semeytany.kz – Абай облысының әкімі Берік Уәли Семей қаласына жұмыс сапары барысында әскери қызметшілерге арналған медициналық мекеменің қазіргі жағдайымен танысты. Облыс басшысы күрделі жөндеу жұмыстары жүріп жатқан әскери госпиталь ғимаратына арнайы барып, жұмыс барысын бақылап шықты.
Қаржы тапшылығынан тоқтаған жөндеу қайта жанданады
«Шығыс» өңірлік қолбасшылығына қарасты Семей, Павлодар және Жарма ауданының Жаңғызтөбе кентіндегі әскери гарнизондарға қызмет көрсететін бұл екі қабатты госпиталь 75 төсек-орынға арналған. Мұнда рентген, компьютерлік томография, флюорография кабинеттері қарастырылған.
2024 жылдың желтоқсан айында басталған күрделі жөндеу жұмыстары демонтаж кезеңінен кейін қаржылық қиындықтарға байланысты тоқтап қалған. Қазіргі таңда сыртқы жөндеу, электр жүйесін тарту, жылыту және желдету жүйесін орнату, ішкі әрлеу жұмыстары аяқталмай тұр.
Қосымша 540 миллион теңге бөлінді
Аймақ басшысы бұл нысанның маңызын ескере отырып, облыстық бюджеттен қосымша қаражат бөлінгенін жеткізді.
– Әскери госпиталь 1995 жылы салынған. Содан бері алғаш рет күрделі жөндеу жұмыстары қолға алынғанымен, құрылыс аяқталмай тоқтап қалған. Облыстық бюджетті нақтылау кезінде біз қосымша 540 миллион теңге бөлдік. Сондай-ақ республикалық бюджеттен қаржы сұратылды. Бұл бастаманы Мәжіліс депутаттары Нұртай Сабильянов пен Айгүл Құспан да қолдап отыр, – деді Берік Уәли.
Жоспар бойынша, госпитальдің жөндеу жұмыстары қайта жанданып, әскери қызметшілерге сапалы медициналық қызмет көрсететін толыққанды мекеме ретінде пайдалануға беріледі.
