Semeytany.kz – Абай облысының әкімі Берік Уәли Курчатов қаласының тұрғындарын жеке мәселелері бойынша қабылдады. Кездесуге келгендер жылу мен ауыз су жүйелерін жаңарту, әлеуметтік нысандарды жөндеу және иесіз қалған ғимараттарды қалпына келтіру сияқты өзекті проблемаларды көтерді.
Азаматтар Школьная және Абай көшелеріндегі көпқабатты үйлерді жөндеуді, №1 және №2 мектептердің стадиондарын ретке келтіріп, қоршауларын жаңартуды сұрады. Сондай-ақ бұрынғы полиция бөлімінің ғимаратын балабақшаға айналдыру, қаңғыбас иттер мәселесін шешу, цифрлық телеарналар саны мен сапасын арттыру, жастарға техникалық білім беруді дамыту жөнінде де ұсыныстар айтылды.
Аймақ басшысы бұл мәселелердің барлығы назарға алынатынын, тиісті басқармаларға нақты тапсырмалар жүктелгенін айтты.
– Қаланың бірыңғай жылу көзі бойынша жоба сараптамада жатыр. Ауыз су жүйелерін қайта құруға арналған 6,4 млрд теңгенің жобасы дайындалуда. Биыл облыс бойынша жалға берілетін 1140 пәтер сатып алынса, оның 70-і Курчатовқа тиесілі болады. Мәдениет үйі, мектеп, аурухана секілді әлеуметтік нысандар кезең-кезеңімен жөнделеді, – деді Берік Уәли.
Тұрғындарды қабылдауға дейін басқарма басшылары да халықпен жүздесіп, қойылған сауалдарға жауап берген.
