Semeytany.kz – Курчатов қаласында бос тұрған тұрғын үйлерді қайта қалпына келтіру жұмыстары жалғасып жатыр. Облыс әкімі Берік Уәли шаһарға жұмыс сапарымен барып, жүргізіліп жатқан құрылыс барысымен танысты.
Әуелі аймақ басшысы Школьная көшесі, 2-үйге ат басын бұрып, жөндеу жұмыстары аяқталуға жақын көпқабатты тұрғын үйді аралады. Жалпы ауданы 2800 шаршы метрден асатын 4 қабатты ғимаратта 36 пәтер бар. Құрылыс жұмыстары былтыр басталған. Қазір үйдің ішкі-сыртқы жұмыстары толық аяқталып, тек аула абаттандыру және балалар алаңын орнату ғана қалған.
Жалпы, Курчатов қаласында бұрын иесіз қалған 28 тұрғын үйді қайта жандандыруға болады. Соның ішінде екеуі жуық арада пайдалануға берілмек. Бұдан бөлек тағы 5 үйді жөндеу жоспарланған. Толық жаңартылған баспаналар көпбалалы отбасыларға, әлеуметтік жағынан аз қамтылған азаматтарға, жетім балалар мен мемлекеттік қызметкерлерге беріледі. Бүгінде қалада 249 адам тұрғын үй кезегінде тұр.
Облыс әкімі Берік Уәли нысандарды аралау барысында құрылыс сапасына оң бағасын беріп, жұмысты жүйелі жалғастыруды тапсырды.
– Қалпына келтірілетін үйлер бар, тек кезең-кезеңімен қолға алу керек. Сонда ғана баспана мәселесін едәуір жеңілдетеміз, – деді өңір басшысы.
