Semeytany.kz – Абай Құнанбайұлының 180 жылдығына орай Абай ауданында мәдени және спорттық нысандарды жаңғырту жұмыстары қарқынды жүріп жатыр. Бұл туралы аудан әкімі Мейіржан Смағұлов мәлім етті.
Қазіргі таңда «Абай саябағы», «Абай алаңы», Қарауыл төбедегі ипподром, Орталық стадион, аудандық Мәдениет үйі және «Жидебай – Бөрілі» мемлекеттік тарихи-мәдени музей-қорығы толық жаңғыртылуда. Бұл нысандар алдағы мерекелік іс-шаралардың басты орталықтары болады.
8 тамыз күні Абай саябағында негізгі фестиваль бастау алып, сол жерде «Сұлу әйел» және «Ер жігіт» байқауларының кезеңдері өтпек. Сонымен қатар, 8–10 тамыз аралығында өңірлерден келетін қонақтар үшін этнографиялық бағыттағы қазақ үйлер мен шағын музейлер қызмет көрсетеді. Садақ ату сайысы 400 орындық Орталық стадионда, ал республикалық «Ілім-Білім» зияткерлік байқауы аудандық Мәдениет үйінде ұйымдастырылады.
Ұлттық ат спортын дамыту мақсатында Қарауыл төбеде инженерлік инфрақұрылым жаңартылып жатыр. Мұнда су және жарық жүйелері тартылып, санитарлық талапқа сай модульдік әжетханалар, қоқыс жәшіктері мен өзге де нысандар орнатылуда.
