Semeytany.kz – Абай Құнанбайұлының 180 жылдығына арналған ауқымды мерекелік іс-шаралар аясында Абай ауданындағы Қарауыл төбеде ұлттық нақыштағы этно-қалашық құрылмақ. Бұл туралы аудан әкімі Мейіржан Смағұлов мәлімдеді.
Әкімнің айтуынша, облыс қала-аудандары мен мекемелеріне тиесілі 180 киіз үй Қарауыл төбеге тігіледі. Сонымен қатар, Абай саябағы аумағында кәсіпкерлік және музейлік бағыттағы қазақ үйлер мен өлкетану экспозициялары ұйымдастырылады. Қолөнер шеберлері мен ұлттық бұйымдар өндірушілерге арналған сауда алаңы ашылып, этномәдени рух пен ұлттық құндылықтар кеңінен таныстырылады.
8–10 тамыз аралығында қонақтар мен тұрғындар үшін арнайы қоғамдық көліктер қатынап, 12 автобус пен 10 инватакси қызмет көрсетеді. Абай саябағы маңында 6480 көлікке арналған автотұрақ, аялдамалар және мүмкіндігі шектеулі азаматтарға арналған аймақтар қарастырылған.
Қоғамдық тәртіпті қамтамасыз ету үшін 900 әскери қызметкер жұмылдырылса, 6 жедел жәрдем көлігі мен 40 төтенше жағдай қызметкері, 6 өрт сөндіру техникасы дайын тұрады. Сонымен қатар, 500-ге жуық ерікті шараларды ұйымдастыруға көмектесіп, ақпараттық қолдауға БАҚ пен танымал блогерлер тартылмақ.
