Semeytany.kz – Семей қаласында ұлы ойшыл Абай Құнанбайұлының 180 жылдық мерейтойына арналған онкүндік мерекелік шаралар 1 тамызда бастау алады. Бұл туралы қала әкімінің міндетін атқарушы Бекжан Бапышев өңірлік коммуникациялар қызметі алаңында өткен баспасөз мәслихатында хабарлады.
Бағдарлама Бейбітшілік аралында өтетін этноауыл мен мәдени-спорттық көріністермен ашылады. Алғашқы күні «АДАМЗАТТЫҢ АЛЫБЫ – ХАКІМ АБАЙ» атты салтанатты рәсім өткізіліп, Арбат алаңында Абай туралы деректі фильмдер көрсетіледі.
Он күн бойы этноауылда ұлттық спорт түрлерінен ашық турнирлер, зияткерлік ойындар, әдеби-музыкалық кештер өтеді. Сонымен қатар, «Абай Quiz» республикалық байқауы, қазақ күресінен чемпионат, халықаралық марафон, мүшәйралар мен шығармашылық көрмелер ұйымдастырылады. Ертіс жағасында күштік экстрим турниріне еліміздің әр аймағынан спортшылар қатыспақ.
5 тамыздан бастап халықаралық сән көрсетілімі өтсе, қала аумағында Абай мұрасын насихаттайтын театрландырылған көріністер қойылып, QR-код арқылы Абай шығармашылығына қолжетімділік қамтамасыз етіледі. Волонтерлік және қайырымдылық шаралары да назардан тыс қалмайды.
10 тамызда Орталық алаңда «Құлақтан кіріп бойды алар…» атты гала-концерт өтеді. Онда «Ұлытау» тобы, Жанар Дұғалова, Әбдіжаппар Әлқожа және басқа да танымал әртістер өнер көрсетіп, мерекені салтанатты отшашу түйіндемек.
