Semeytany.kz – Беларусь Республикасындағы «Зубренок» ұлттық балалар білім беру орталығында өткен «Достастық балалары» атты X халықаралық форумға Абай облысының оқушылары қатысып, қазақ елінің атынан өнер мен білім алаңында жоғары деңгейде өнер көрсетті.
ТМД елдерінің белсенді оқушылары жиналған форумға Абай өңірінен дарынды жастар мен олардың жетекшісі – Бородулиха ауданындағы Н.Островский атындағы мектептің мұғалімі Саят Бодомбаев барды. Делегация мүшелері түрлі шығармашылық және танымдық бағдарламаларға қатысып, ұлттық өнер мен дәстүрді дәріптеді.
Форум аясында өткен Қазақстан күні ерекше есте қалды. «Қазақстан – Ұлы Дала елі, бірлік пен болашақтың Отаны» атты мәдени кеште оқушылар домбыра тартып, «Қара жорға» биін билеп, Абай мен Мұқағали жырларын оқыды. Асық ойыны мен дәстүрлі көріністер де көпшіліктің көңілінен шықты. Интерактивті бөлім мен бейнеролик арқылы көрермендер Қазақстан туралы мол мағлұмат алды.
Шараны Еділ мен София есімді қатысушылар үш тілде жүргізіп, халықаралық аудиторияның ризашылығына бөленді. Олар Ахмади есімді замандастарымен бірге Беларусь телеарналарына сұхбат беріп, елімізді кеңінен таныстырды.
Сондай-ақ форумда Ұлы Жеңістің 80 жылдығына орай қазақстандық жауынгерлердің Брест қамалын қорғаудағы ерлігі туралы бейнематериал көрсетілді.
Абай облысының делегациясы бұл форум арқылы еліміздің рухани байлығын, жас ұрпақтың зияткерлік әлеуетін халықаралық деңгейде таныта білді.
