Әлеумет | Агросектор
Semeytany.kz – Абай облысында 2025 жылы өтетін ауыл шаруашылығы санағына дайындық басталды. Бұл туралы өңірлік кеңейтілген аппарат жиналысында Ұлттық статистика бюросының облыстық департамент басшысы Берік Терлікбаев мәлімдеді.
Мемлекет басшысының тапсырмасына және Үкімет қаулысына сәйкес өтетін ұлттық ауыл шаруашылығы санағы биыл 1 тамыз бен 20 қазан аралығында жүргізіледі. Облыс бойынша санаққа 665 заңды тұлға, 112 жеке кәсіпкер, 10 281 шаруа қожалығы мен 65 412 үй шаруашылығы қатысады деп жоспарланып отыр.
Санақ екі кезеңмен өтеді. Бірінші кезеңде, яғни 1–31 тамыз аралығында, sanaq.gov.kz сайтында онлайн түрде жауап беруге болады. Екінші кезеңде, 20 қыркүйек пен 20 қазан аралығында, арнайы дайындалған интервьюерлер планшет арқылы сауалнама жүргізеді. Бұл кезеңге 35 нұсқаулық учаске, 148 интервьюер және 29 нұсқаушы тартылмақ.
Облыс әкімі аудан және қала әкімдеріне санақтың сапалы әрі қауіпсіз өтуін жеке бақылауға алуды, барлық шаралар жоспарының орындалуын қамтамасыз етуді тапсырды.
Сондай-ақ кеңейтілген жиында отбасының цифрлық картасына қатысты жұмыстардың барысы сөз болды. Жұмыспен қамту және әлеуметтік бағдарламаларды үйлестіру басқармасының басшысы Айман Нұрлыбекқызы «Д» және «Е» санатындағы отбасылардың санын азайту жөнінде баяндама жасады.
2023 жылдан бері қолданылып келе жатқан цифрлық картада бүгінге дейін 203,4 мың отбасының 612,8 мың адамы тіркелген. 2025 жылғы 29 мамырдағы дерек бойынша Абай облысында жағдайы төмен отбасылар саны 5 265-ке азайған.
Өңір басшысы әкімдіктерге бұл бағыттағы жұмысты жалғастыруды, шұғыл әрі дағдарыс жағдайындағы отбасылар санының артуына жол бермеуді, көрсеткіштердің ай сайынғы орындалуын қатаң бақылауға алуды тапсырды. Сонымен қатар балаларға қатысты мәліметтерді білім беру базасымен сәйкестендіру, сақтандыру төлемдері мен NEET санатындағы жастар жайлы деректерді нақтылау, өзін-өзі жұмыспен қамтығандардың төлемдерін бақылау жөнінде де нақты міндеттер жүктелді.
