Әлеумет | Қауіпсіздік
Semeytany.kz – Бүгін Абай облысының әкімі Берік Уәлидің төрағалығымен кеңейтілген аппараттық кеңес өтті. Жиын барысында өңірдегі орман және дала өрттерінің алдын алу, цифрлық карта бойынша әлеуметтік топтағы отбасыларды қолдау, сондай-ақ 2025 жылы өтетін ауыл шаруашылығы санағына дайындық мәселелері қаралды.
Кеңеске облыстық басқарма басшылары, өңірлік департамент жетекшілері, қала және аудан әкімдері бейнебайланыс арқылы қатысты.
Өрт саны 4,5 есеге артқан
Облыстық төтенше жағдайлар департаментінің басшысы Манарбек Шапағатовтың мәліметінше, өңірде өрт қауіпті маусымға дайындық аясында кешенді шаралар қолға алынған. Атап айтқанда, орман алқаптарына жақын елді мекендерде механикаландырылған күзет ұйымдастырылып, авиация мен тікұшақтар кезекшілікке тартылған.
Алайда қабылданған шараларға қарамастан, биыл табиғи өрттердің саны күрт артқан. 252 оқиға тіркеліп, өткен жылмен салыстырғанда 4,5 есе өсім байқалған.
Орман өрттерінің алдын алу мақсатында 170 маманнан тұратын 38 мобильді топ 334 рейд жүргізіп, 93 адамды әкімшілік жауапқа тартқан.
Баяндамаларда шалғай ауылдарда құрылған 70 өрт сөндіру бекетінің көбі жылы ғимаратпен жабдықталмағаны да айтылды. Бұл қыс мезгілінде қауіпсіздік талаптарын орындауға кері әсер етуі мүмкін.
Өртке қарсы күрес – басты міндет
Облыс әкімі салаға жауапты орынбасары Серік Төленбергеновке бірқатар нақты тапсырма берді. Атап айтқанда:
-
«Семей орманы» резерватында өртті ерте анықтайтын автоматтандырылған жүйе орнату;
-
Ресеймен шекаралас аумақтарда орман соқпағын салу;
-
Өрт сөндіру техникаларын лизингке алу;
-
Резерватқа берілген техниканы тиімді пайдалану жолдарын қарастыру;
-
Орман өрттерімен күресетін мамандар тапшылығын шешу жөнінде ұсыныс әзірлеу.
Сонымен қатар, облыс әкімдігі жұмылдыру даярлығы және азаматтық қорғау басқармасына төтенше жағдайлар департаментімен бірлесіп, ерікті өрт сөндіру құрылымдарының жұмысын бағалауды және минералды жолақтарды қоқыстан тазарту бойынша мониторинг жүргізуді тапсырды.
