Semeytany.kz – Премьер-министр Олжас Бектеновтің төрағалығымен өткен Үкімет отырысында 2025 жылдың алғашқы алты айындағы әлеуметтік-экономикалық даму қорытындылары мен республикалық бюджеттің атқарылуы қаралды.
Ұлттық экономика министрі Серік Жұманғарин, Ұлттық банк төрағасы Тимур Сүлейменов және Қаржы министрі Мәди Тәкиев экономикалық ахуалға қатысты есеп берді. Сондай-ақ бірқатар салалық министрлер мен өңір басшыларының баяндамалары тыңдалды.
Алдын ала мәліметке сәйкес, 2025 жылдың қаңтар-маусым айларында елдің жалпы ішкі өнімі 6,2%-ға өскен. Бұл көрсеткіштің артуына құрылыс, сауда, өнеркәсіп пен байланыс салаларындағы белсенділік ықпал еткен.
Отырыста Премьер-министр Мемлекет басшысы Қасым-Жомарт Тоқаевтың экономиканы әртараптандыру және оның ұзақмерзімді, тұрақты өсуін қамтамасыз ету туралы тапсырмаларын орындау барысын атап өтті. Олжас Бектенов Үкіметтің қабылдаған кешенді шаралары іскерлік белсенділікті ынталандырып, инфрақұрылым мен цифрлық технологияларды дамытуға бағытталғанын айтты.
Үкімет басшысы инвестициялық жобаларды жүзеге асыру, шетелдік және ішкі капиталды тарту, экспортқа бағытталған өндірістерді қолдау, арнайы экономикалық және индустриялық аймақтарды дамыту, көлік дәліздерінің өткізу қабілетін арттыру сынды маңызды бағыттарға жеке-жеке тоқталды.
Сонымен қатар ол ауыл шаруашылығында логистика мен сақтау жүйесін жетілдіруді, аграрлық маркетплейс құруды, мұнай-газ саласындағы жобаларды жеделдетуді, инфляцияны бақылау мен бағаны тұрақтандыру ісін күшейтуді тапсырды.
— Барлық салада кешенді әрі нақты іс-шаралар жүзеге асса, бұл тұрақты экономикалық өсімнің мықты негізі болмақ, – деді Үкімет басшысы.
