Semeytany.kz – Абай облысындағы әуе шабуылына қарсы 31767-Л әскери бөлімінде бойы 2 метр 8 сантиметр болатын сарбаз Арман Қайыржанов Отан алдындағы борышын өтеп жүр. Ерекше бойымен көпшілік назарын аудартқан Арман – Павлодар облысы, Екібастұз қаласының тумасы.
Сарбаздың айтуынша, оның отбасы мүшелері де бойшаң. Әкесі мен анасы, әпкесі мен қарындасы – барлығы да көптің арасынан бірден көзге түседі. Арманның өзі де мұны мақтаныш көреді.
– Ұзын бой маған еш қиындық тудырмайды. Әскери өмірге бейімделіп кеттім. Қызметімді толыққанды атқарып жүрмін, – дейді ол.
Арнайы тігінмен жабдықталған
Арманға стандартты төсек-орын мен киім жарамайды. Сол себепті әскери кереуеті 50 см-ге ұзартылып, киім-кешегі мен 50-өлшемдегі аяқ киімі арнайы тапсырыспен дайындалған. Оның айтуынша, ұзын бойына байланысты әскерде ешқандай қиындық көріп жүрген жоқ.
Болашақ баскетболшы ма?
Арман Қайыржанов мектеп пен колледжде де ең бойшаң оқушы болған. Осы ерекшелігі оның спортқа, әсіресе баскетболға қызығушылығын арттырған.
– Әскерге дейін төрт жыл бойы баскетболмен айналыстым. Соңғы жылдары Екібастұз қаласының атынан жарыстарға қатыстым, – дейді ол.
Арман – Екібастұз қаласында «ең бойшаң азамат» ретінде арнайы марапатқа ие болған. Тіпті дәрігерлер оның Қазақстандағы ең ұзын адам екенін де растаған.
– Тағы өсетін шығармын. Өз еркіммен әскерге келдім. Бұл – әр азаматтың борышы, – дейді Арман Қайыржанов.
