Semeytany.kz – Абай облысының әкімі Берік Уәли су шаруашылығы қызметкерлері күніне орай сала мамандарына құрмет көрсетті.
Салтанатты шарада аймақ басшысы су саласының ел үшін маңызын атап өтіп, еңбеккерлердің үлесін жоғары бағалады.
– Байтақ даламызда күні-түні қызмет етіп, елдімекендер мен өндіріс ошақтарын тіршілік нәрімен қамтамасыз етіп жүрген жұмысшылардың еңбегі зор. Су қауіпсіздігі – ел қауіпсіздігінің бір тармағы. Бұл саладағы қажырлы қызмет мемлекет тарапынан лайықты бағаланып отыр. Сіздерді кәсіби мерекелеріңізбен шын жүректен құттықтаймын, – деді Берік Уәли.
Шара аясында «Қазсушар» РМК «Абай» филиалының Жарма және Ақсуат өндірістік учаскелерінің қызметкерлері – Бауыржан Қайыңбаев пен Нұрлан Рамазановқа Мемлекет басшысының Жарлығымен ІІІ дәрежелі «Еңбек даңқы» ордені табысталды.
Облыс бойынша су шаруашылығы саласында 900-ге жуық маман еңбек етеді. Қазіргі таңда өңірде 6 су қоймасы, 10 гидротехникалық нысан салынып, 17 ирригациялық жүйе жаңартылмақ.
