Semeytany.kz — «Металлург күні» кәсіби мерекесіне орай Премьер-министр Олжас Бектенов еліміздің тау-кен металлургия саласының үздіктеріне Мемлекет басшысы Қасым-Жомарт Тоқаев атынан мемлекеттік наградалар табыс етті.
Тәуелсіздік жылдарында тұрақты өсімге қол жеткізген бұл сала бүгінде экономикаға 6,9% үлес қосып отыр. 110 мыңнан астам адам еңбек ететін кешен машина жасау, құрылыс, мұнай-газ және энергетика бағыттарының дамуына елеулі әсер етіп келеді.
Премьер-министр металлургия саласын дамыту Үкіметтің басты бағыттарының бірі екенін айтып, өндірісті жаңғырту, жаңа кен орындарын игеру, озық технологияларды енгізу жалғасын табатынын атап өтті.
Мемлекет басшысы жариялаған «Жұмысшы мамандықтар жылы» аясында биыл алғаш рет «Қазақстанның еңбек сіңірген кеншісі» және «Қазақстанның еңбек сіңірген өнеркәсіп қайраткері» атақтары бекітілді. Жалпы 600-ден астам өндіріс озаты мен еңбек ардагерінің еңбегі еленіп, марапатқа ие болды.
Мемлекеттік наградаларды салалық министрмен бірге Астана мен Алматы қалалары, Ұлытау, Абай, Қарағанды, Павлодар, Шығыс Қазақстан, Қызылорда, Ақтөбе және Қостанай облыстарының әкімдері де табыстады.
«Kazakhmys Smelting» ЖШС Жезқазған мыс балқыту зауытының балқытушысы Болат Айдаболов бұл марапат барлық сала еңбеккерлерінің үлесін бағалау екенін айтса, «Қазақмыс корпорациясы» ЖШС флотаторы Гүлбану Жұмаділдина марапатты ұжым еңбегінің жемісі деп бағалады.
