Semeytany.kz – Облыс әкімі Берік Уәли Семей қаласына жұмыс сапары барысында Комсомол кентінде бой көтеріп жатқан әмбебап өрт сөндіру депосының құрылысымен танысты.
700 миллион теңге көлеміндегі жоба «Демеу Қазақстан қоры» корпоративтік қорының қаражаты есебінен жүзеге асырылып жатыр. 0,82 гектар аумақта орналасатын жаңа нысан 6 арнайы техникаға лайықталып жобаланған. Құрылысы сәуір айында басталған депо жыл соңына дейін пайдалануға беріледі деп күтілуде.
Депо аумағында спортзал, санитарлық бөлмелер мен техникалық орынжайлар қамтылған модульдік фитнес-зал, сондай-ақ 11 бөлмелі екі қабатты апартамент салынуда. Мұнда өрт сөндірушілердің күнделікті тұрмысына қажетті барлық жағдай қарастырылған. Сонымен қатар, ішкі алаңда футбол алаңы, жаттығу мұнарасы және спорттық нысандар орналастырылады.
Қазіргі таңда Абай облысында 70 өрт сөндіру бекеті бар, оның 11-і жыл бойы тұрақты қызмет етеді. Жыл басынан бері Бесқарағайда жаңа бекет ашылса, енді Қабанбай ауылында да құрылыс басталған. Аймақ басшысы бұл бағыттағы жұмыстар кезең-кезеңімен жалғаса беретінін атап өтті.
